सोने-चांदी तेजीत ; जाणून घ्या किती रुपयांनी महागले दोन्ही धातू

मुंबई : देशांतर्गत कमॉडिटी बाजारात सोने आणि चांदीच्या दरात सलग दुसऱ्या सत्रात वाढ झाली आहे. आज मंगळवारी मल्टी कमॉडिटी एक्सचेंजमध्ये (MCX) सोने ५०१६० रुपयांवर ट्रेड करत असून चांदीचा भाव एक किलोला ६०६२० रुपये झाला आहे. सोने ३० रुपयांनी तर चांदी २३६ रुपयांनी वाढले आहे. याआधी सोमवारी बाजार बंद होताना सोने ५०२ रुपयांनी महागले होते. सोन्याचा भाव प्रती १० ग्रॅम ४९६५० रुपयांवर बंद झाला. चांदीमध्येही १३६१ रुपयांची वाढ झाली होती. चांदीचा भाव एक किलोला ५९०२७ रुपये झाला. सोने आणि चांदीच्या दरात तेजी दिसून आली. चीनमधील औद्योगिक उत्पादनात वाढ आणि युरोपातील बँकांकडून आर्थिक पॅकेज जाहीर केले जाण्याची शक्यता असल्याने जागतिक बाजारात सोने आणि चांदीच्या किंमतींना फायदा झाला असल्याचे जाणकारांचे म्हणणे आहे. जागतिक बाजारातील अस्थिरतेने गेल्या आठवड्यात कमॉडिटी बाजारात सोने २००० रुपयांनी तर चांदी ९००० रुपयांनी स्वस्त झाली होती. ७ ऑगस्ट रोजी कमॉडिटी बाजारात सोन्याचा भाव ५६२०० रुपये प्रती १० ग्रॅम इतका विक्रमी स्तरावर गेला होता. सध्या त्यात ७००० रुपयांची घसरण झाली आहे. इतर चलनांच्या तुलनेत डॉलरचे मूल्य मजबूत होत असल्याने सोने आणि चांदीमध्ये घसरण झाली होती. आर्थिक अनिश्चिततेच्या पार्श्वभूमीवर सुरक्षित गुंतवणूक म्हणून गुंतवणूकदार आणि मालमत्ता व्यवस्थापन करणाऱ्या वित्त संस्थांकडून सोन्यातील गुंतवणुकीला प्राधान्य दिले जाते. जागतिक कमॉडिटी बाजारात सध्या सोन्याचा भाव प्रती औंस १८६०.१९ डॉलरवर स्थिर आहे. डॉलर इंडेक्स ०.१४ टक्के घरसला आहे. या आधी डॉलर इंडेक्सने दोन महिन्यांचा उच्चांक गाठला होता. चांदीचा भाव ०.३ टक्के वाढला असून तो २२.९२ डॉलर प्रती औंस झाला आहे. 'goodreturns.in'या वेबसाईटनुसार मुंबईत २२ कॅरेट सोन्याचा भाव ४८२६० रुपये आहे. तर २४ कॅरेटचा भाव ४९२६० रुपये आहे. चांदीचा भाव एक किलोला ६०४०० रुपये असून त्यात २४०० रुपयांची वाढ झाली आहे. दिल्लीतील सराफा बाजारात आज २२ कॅरेटचा भाव ४८२६० रुपये असून २४ कॅरेटचा भाव ५२७५० रुपये आहे. कोलकात्यामध्ये आज मंगळवारी २२ कॅरेट सोनं ४८८६० रुपये तर २४ कॅरेटचा भाव ५१५७० रुपये आहे. चेन्नईत २२ कॅरेटचा भाव ४७७१० रुपये आहे. २४ कॅरेटसाठी सोने दर ५२०५० रुपये आहे. दसरा आणि दिवाळी महिनाभरावर असल्याने सराफांनी सोने खरेदीवर भर दिला आहे. त्यामुळे मागील आठवड्यात सोने आणि चांदीची मागणी वाढली असल्याने कमॉडिटी विश्लेषकांनी सांगितले.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/3cCxDmy