कच्च्या तेलात घसरण; 'हा' आहे आजचा पेट्रोल आणि डिझेलचा भाव

मुंबई : जागतिक बाजारात कच्च्या तेलाच्या किमतीतील घसरण कायम आहे. त्यामुळे देशात पेट्रोलियम कंपन्यांनी इंधन दर कपातीचा धडाका लावला आहे. आज मात्र दर कपातीला विराम लागला आहे. आज शनिवारी देशभरात आणि स्थिर आहेत. जागतिक बाजारात डब्ल्यूटीआय क्रूडचे दर ३७.४० डॉलर प्रती बॅरल इतके खाली आले आहेत. त्यात ३.४१ टक्क्यांची घसरण झाली. ट्रम्प आणि त्यांची पत्नी यांना करोनाची लागण झाल्यानंतर जगभरातील कमॉडिटी बाजारांवर परिणाम झाला. त्यातच अमेरिकन अर्थव्यवस्था करोनाच्या गर्तेत सापडली आहे. तेथील केंद्रीय बँकेने अर्थव्यवस्था सावरण्यासाठी तेथील केंद्रीय बॅंकेकडून पॅकेज घोषीत केले जाण्याची शक्यता आहे. करोना साथीच्या विस्तारत जाणाऱ्या परिणामामुळे क्रूडच्या मागणीत सातत्याने घट होत आहे. पेट्रोलियम कंपन्यांनी आज इंधन दर स्थिर ठेवले. त्यामुळे मुंबईत पेट्रोल ८७.७४ रुपये आणि डिझेल ७६.८६ रुपये प्रती लीटर कायम आहे. दिल्लीत आजचा पेट्रोलचा भाव ८१.०६ रुपये असून डिझेलचा भाव ७०.४६ रुपयांवर कायम आहे. चेन्नईत पेट्रोल ८४.१४ रुपये असून डिझेल ७५.९५ रुपये झाला आहे. कोलकात्यात पेट्रोल ८२.५९ रुपये आहे. डिझेलचा भाव ७३.९९ रुपये प्रती लीटर झाले आहे. सार्वजनिक क्षेत्रातील इंडियन ऑइल कंपनीने सप्टेंबरमध्ये डिझेल दरात २.९३ रुपयांची कपात केली आहे. तर पेट्रोल ९७ पैशांनी कमी झाले आहे. त्याशिवाय सार्वजनिक वितरण व्यवस्थेसाठी (रेशनिंग) केरोसीन दरात २.१९ रुपयांची कपात केली आहे. १ ऑक्टोबरपासून मुंबईत केरोसीनचा दर प्रती लीटर २३.६५ रुपये झाला आहे. त्याआधी तो २५.८४ रुपये होता. देशात अनलॉक-५ ची घोषणा झाली आहे. यामुळे टाळेबंदी लागलेले अनेक निर्बंध शिथिल होणार आहेत. वाहतूक देखील पूर्वपदावर येणार असल्याने इंधन मागणी वाढेल असा आशावाद पेट्रोलियम कंपन्यांनी व्यक्त केला आहे.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/34AcTID