अबब! ४१२ कोटी रुपयांच्या आनलाइन चोरीचा डाव 'असा' उधळला

म. टा. प्रतिनिधी, जळगाव: बँकांमधील मोठे खातदार हुडकून त्यांच्या बँक खात्याच्या तपशिलासह एटीएमचे स्क्रीनशॉट मिळवून हॅकर्सच्या मदतीने देशभरातील अनेक बँक खातेदारांच्या खात्यातून तब्बल ४१२ कोटी रुपयांपेक्षा जास्त रक्कम आनलाइन पद्धतीने चोरी करण्याचा डाव पोलिसांनी उधळून लावला आहे. हॅकर्स मनीष भंगाळेला २० टक्के रक्कमेचे अमिष देत त्याच्या सहकार्याने या टोळीने डाव अखाण्यास सुरुवात केली होती. मात्र, तत्पूर्वीच भंगाळे याने पोलिसांना माहिती दिल्यानतंर सापाळा रुचून पोलिसांनी जळगावातील व धुळ्यातील प्रत्येकी एक अशा दोघांच्या जळगावात मुसक्या आवळल्याची माहिती रामानंद पोलीस ठाण्याचे पोलीस निरिक्षक अनिल बडगुजर यांनी दिली. मुख्य संशयित हेमंत ईश्वरलाल पाटील (वय ४२ रा. भुरे मामलेदार प्लॉट, शिवाजीनगर) व बांधकाम ठेकेदार मोहसीन खान ईस्माईल खान (वय ३५ रा देवपूर, ) अशी अटक केलेल्या दोघांची नावे आहेत. या गुन्ह्यात देशभरातील अनेक संशयितांचा सहभाग असण्याची शक्यता आहे. आणखी सात संशयितांची नावे निष्पन्न झाली असून, त्यांच्या शोधार्थ चार पोलिसांची पथके रवाना करण्यात आली आहे. याबाबत माहिती देताना पोलीस निरिक्षक अनिल बडगुजर यांनी सांगीतले की, दोन महिन्यांपूर्वी काही लोक हे हॅकर मनीष भंगाळे याच्या संपर्कात आले. ते विविध बँकांच्या खात्यांची माहिती, एटीएम कार्डचा फोटो असा डेटा देऊन ऑनलाइन पध्दतीने चोरी करुन संबंधितांचे पैसे काढून द्यावेत यासाठी अमिष देत होते. या दरम्यान मनीष हा त्याच्या मित्रासोबत गुजरातलाही गेला. त्या ठिकाणी काही जणांनी त्यांना बँक खात्यांची माहिती, फोटो दिले व संबंधित खातेधारकांची रक्कम ऑनलाइन चोरी करून ट्रान्सफर करण्याबाबत सांगितले होते. या कामाबद्दल त्यांनी मनीष भंगाळे यास एकूण रक्कमेच्या २० टक्के कमिशन देण्याचे आमिषही दाखविले होते. महाराष्ट्रासह देशभरातील विविध ठिकाणचे लोकही यात सहभागी असल्याचे भंगाळे याला समजले. या सर्वांनी भंगाळे यास विविध ठिकाणच्या बँकेच्या खातेधारकांचा गोपनीय असा डेटा चोरून तो भंगाळे याला पुरवला होता. ऑनलाइन पैसे काढण्यासाठी हेमंत यांच्या संपर्कातील ठिकठिकाणचे अनेक जण मनिष यास त्याच्या व्हॉट्सअॅपवर विविध बँक ग्राहकांचा डेटा चोरुन त्याची माहिती पाठवित होते. मनीष याने संबधित सर्व बँक डेटा मोबाइलमध्ये सेव्ह करुन ठेवला. धक्कादायक प्रकार असल्याने मनिष भंगाळे याने या प्रकाराबाबत १२ ऑक्टोबर रोजी रामानंदनगर पोलीस ठाण्याचे पोलीस निरिक्षक अनिल बडगुजर यांना माहिती दिली. निरिक्षक अनिल बडगुजर यांनी या गंभीर प्रकाराबाबत पोलीस अधीक्षक डॉ. प्रविण मुंढे यांना माहिती दिली. या प्रकरणात संशयित तसेच मनिष भंगाळे यांच्याकडून मिळालेली माहिती दाखविली. डॉ. प्रविण मुंढे यांच्या सूचनेनुसार अनिल बडगुजर यांनी सुरुवातीला ज्या उद्देशाने संशयितांनी बँकेचा डाटा पाठविला होता, त्यानुसार संशयितांना अडकविण्यासाठी नियोजन केले. यात मनिष भंगाळे यांच्या मदतीने संशयितांनी दिलेल्या एका बँकधारकाच्या माहितीच्या आधारावर त्याचे एक हजार रुपये काढण्यात आले. यानंतर संबंधित हजार रुपयांपैकी हेमंत पाटील यांच्या खात्यावर २५० रुपये, धुळे येथील मोहसीन याच्या खात्यावर २५० रुपये तर तिसऱ्या एका जणाच्या खात्यावर पाचशे रुपये पाठविण्यात आले. यानंतर पैसे काढण्याचा प्रयोग यशस्वी झाल्याने मनिष भंगाळे याने संशयितांना सांगितले. एक हजार रुपयांचा प्रयोग यशस्वी झाल्यानंतर आता उर्वरीत असलेल्या बँक खातेदारांच्या डेटानुसार त्यांची आहे ती रक्कम काढण्याचे असल्याचे सांगत मनिष भंगाळेकरवी संशयितांना १४ ऑक्टोंबर रोजी संशयितांना जळगावात बोलाविण्यात आले. हेमंत पाटील व मोहसीन खान हे संशयित एकलव्य मैदानाच्या मागील बाजूस अर्थव डेअरीजवळ आले. यावेळी साध्या वेशातील पोलिसांनी त्यांना ताब्यात घेतले. त्याच्याजवळील मोबाइलसह त्याच्याजवळ असलेल्या सर्व वस्तू जप्त करण्यता आल्या आहेत. अत्यंत क्लिष्ट स्वरुपाचा गुन्हा असल्याने या गुन्ह्याची फिर्याद तयार करताना पोलिसांना पाच ते सहा तास लागले. शुक्रवारी पहाटे पाच वाजता अखेर या प्रकरणी गुन्हा दाखल करण्यात आला. याप्रकरणी पोलीस निरिक्षक अनिल बडगुजर यांच्या फिर्यादीवरुन गुन्हा दाखल करण्यात आला. तपास पोलीस उपअधीक्षक कुमार चिंथा हे करीत आहेत. दोघांजवळून मिळून आलेल्या सहा जणांच्या बँक खात्याच्या तपशीलानुसार संबंधित खातेधारकांच्या खात्यावर एकूण ४१२ कोटींची रक्कम असल्याचे बडगुजर यांनी सांगितले. संशयितांनी कशापद्धतीने बँकखात्यांची माहिती मिळविली, जी माहिती फक्त बँक आणि खातेधारकालाच माहिती असते ती माहिती संशयितांनी कशी व कुठून मिळविली आदी प्रश्न अनुत्तरीत असून तपासात अनेक धक्कादायक बाबी उघड होण्याची शक्यता पोलिसांनी व्यक्त केली आहे. अटक करण्यात आलेल्या दोघांना न्यायालयात हजर केले असता दोघांना चार दिवसांची पोलीस कोठडी सुनावण्यात आली आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2HaQXMa