शेअर बाजारात तेजीची आतषबाजी ; दोन्ही निर्देशांकांची मोठी झेप, सेन्सेक्स ४४००० अंकांवर

मुंबई : तेजीच्या लाटेवर स्वार झालेल्या सेन्सेक्स आणि निफ्टीने आज नवा उच्चांक गाठला आहे. बाजार उघडताच सेन्सेक्सने ४०० अंकांची झेप घेतली आणि तो ४४०००च्या स्तरावर गेला. निफ्टीने १२९०० नवा विक्रमी स्तर गाठला आहे. दोन दिवसांच्या सुट्टीनंतर सुरु झालेल्या शेअर बाजारात सध्या जोरदार खरेदी सुरु आहे. आजच्या तेजीत गुंतवणूकदारांची मालमत्ता लाखभर कोटींनी वधारली आहे. आजच्या सत्रात बँका, वित्त संस्था, मेटल, ऑटो, रियल इस्टेट, हॉटेल्स अँड टुरिझम या क्षेत्रात खरेदीचा ओघ सुरु आहे. एचडीएफसी बँक, रिलायन्स इंडस्ट्रीज, एचडीएफसी, एसबीआय, भारती एअरटेल, टाटा स्टील, लार्सन अँड टुब्रो, कोटक महिंद्रा बँक, इंडसइंड बँक, मारुती या शेअरमध्ये वाढ झाली आहे. तर ओएनजीसी, टीसीएस, एक्सिस बँक, पॉवरग्रीड, आयटीसी, बजाज ऑटो, एचसीएल टेक हे शेअर घसरले आहेत. सध्या सेन्सेक्स १४० अंकांनी वधारला असून तो ४३७७८ अंकांवर ट्रेड करत आहे. निफ्टी ४३ अंकांच्या तेजीसह १२८२२ अंंकांवर आहे. फायजरपाठोपाठ मॉडर्न या कंपनीने करोना लसीची यशस्वी चाचणी केल्याचा दावा केला आहे. करोना लस ९४.५ टक्के परिणामकारक असल्याचा दावा मॉडर्न या कंपनीने केला आहे. करोना लसीची यशस्वी चाचणी करणारी मॉडर्न दुसरी अमेरिकन कंपनी ठरली आहे. दरम्यान , आज आशियात बहुतांश शेअर बाजारात तेजी दिसून आली. सोमवारी अमेरिकी शेअर बाजार तेजीसह बंद झाले होते. मॉडर्नने जाहीर केलेल्या करोना प्रतिबंधात्मक लशीने जगभरातील भांडवली बाजारात तेजीचे वातावरण निर्माण झाले असल्याचे जिओजित फायनान्शिअल सर्व्हिसेसचे मुख्य गुंतवणूक अधिकारी डॉ. व्ही. के. विजयकुमार यांनी सांगितले. २०२१ च्या मध्यावधीमध्ये करोनाचा समूळ उच्चाटन होईल, असा अंदाज आहे. बहुतांश गुंतवणूकदारांनी आता उदयोन्मुख बाजारपेठांमध्ये गुंतवणूक वाढवली असल्याचे डॉ. कुमार यांनी सांगितले. त्याआधीच्या सत्रात शनिवारी संध्याकाळी मुहूर्ताला सेन्सेक्स आणि निफ्टीने दणक्यात सुरुवात केली आहे. मुहूर्ताचे सौदे सूर होताच सेन्सेक्सने ३६५ अंकांची झेप घेतली आहे. तो ४३७०९ अंकांवर आहे. राष्ट्रीय शेअर बाजाराचा निफ्टी ८१ अंकांनी वधारला असून १२८०१ अंकावर आहे. सेन्सेक्स आणि निफ्टी आता रेकॉर्ड स्तरावर आहेत. संध्याकाळी ७.१५ वाजता बाजार बंद होताना सेन्सेक्स १५३ अंकांनी वधारून ४३५९६ अंकांवर बंद झाला. निफ्टी ५१ अंकांनी वधारून १२७७० अंकांवर बंद झाला होता. मुहूर्त ट्रेडिंगची पाच दशकांची परंपरा दिवाळीच्या दिवशी स्टॉक मार्केट बंद असले तरी, सेशन्स जवळपास एक तासासाठी सुरू राहते. मुहूर्त ट्रेडिंगची वेळ दरवर्षी बदलत राहते. त्या दिवसातील शुभ समजल्या जाणा-या वेळेनुसार, ही वेळ ठरवली जाते. व्यापारी समुदाय जवळपास निम्म्या शतकापेक्षा जास्त काळापासून ही परंपरा पाळत आहेत. १९५७ पासून बीएसई हे विशेष ट्रेडिंग सेशनचे आयोजन करत आहे. त्यानंतर १९९२ पासून एनएसईद्वारे याचे आयोजन होत आहे. या वर्षी स्टॉक एक्सचेंज १४ नोव्हेंबर रोजी शनिवारी संध्याकाळी ६.१५ ते ७.१५ दरम्यान याचे आयोजन केलं होतं.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/32RcLEo