Akola: रेमडेसिवीर इंजेक्शनचा काळाबाजार, कोविड सेंटरमधील ७ जणांना अटक

अकोला: शहरातील विविध रुग्णालयांत दाखल असणाऱ्या रुग्णांसाठी असलेले चोरून चढ्या दराने विकून काळाबाजार करणाऱ्या सात जणांच्या टोळीला स्थानिक गुन्हे शाखेने मंगळवारी रात्री अटक केली. गेल्या आठवडाभरात स्थानिक गुन्हे शाखेने केलेली ही दुसरी कारवाई आहे. यापूर्वी केलेल्या कारवाईत पाच जणांना अटक केली होती. त्यांच्याकडून ३ रेमडेसिवीर इंजेक्शन जप्त केले होते. त्यांची चौकशी सुरू असतानाच, काल स्थानिक गुन्हे शाखेने खासगी कोविड सेंटरमध्ये काम करणाऱ्या ७ जणांना अटक केली. या सात जणांमध्ये हॉटेल रिजन्सी येथील कोविड सेंटरमध्ये काम करणाऱ्या युवतीसह मेडिकल व हॉस्पिटलमध्ये काम करणाऱ्या युवकांचा समावेश आहे. या सात जणांनी वीस इंजेक्शनची काळ्या बाजारात चढ्या दराने विक्री केल्याची माहिती समोर आली आहे. डाबकी रोडवरील रहिवासी निकिता नारायण वैरागडे (वय २५) ही रिजन्सी हॉटेल येथील कोविड सेंटरमध्ये कामाला होती. कार्तिक मोहन पवार (वय २०, राहणार शिवनगर, मोठी उमरी) हा मल्टिस्पेशालिटी हॉस्पिटलमध्ये कामाला होता. या दोघांसह गौतम नरेश निदाने (वय २०, राहणार शिवाजी नगर) हा युनिक हॉस्पिटल कोविड केअर सेंटरमध्ये कामाला होता. अभिषेक जगदीश लोखंडे ( वय २२, राहणार मोठी उमरी) , शुभम दिनेश वराडे ( वय २० , राहणार लाडीस फाईल, अकोट फाईल), देवेंद्र संजय कपले (वय २२, राहणार मोठी उमरी) व अंकित संतोष तिकांडे (वय १८, राहणार मोठी उमरी) या सात जणांनी कोविड केअर सेंटरमध्ये दाखल असलेल्या रुग्णांचे इंजेक्शन त्यांना न देता त्या इंजेक्शनची चोरी करत होते. या इंजेक्शनची शहरातील विविध कोविड केअर सेंटर तसेच हॉस्पिटलमध्ये दाखल असलेल्या रुग्णांना चढ्या दराने विक्री केली. या प्रकाराची माहिती स्थानिक गुन्हे शाखेला मिळाल्यानंतर स्थानिक गुन्हे शाखेने या सातही आरोपींना अटक केली. या आरोपींनी रुग्णांचे रेमडेसिवीर इंजेक्शन बाहेर विकल्याची कबुली दिली. सातही आरोपींविरोधात पोलीस ठाण्यात गुन्हा दाखल करण्यात आला आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3dW7tNS