प्रेमासाठी तरूणी मुंबईहून झारखंडला गेली; सोबत लाखो रुपये, दागिने होते, तिथे घडलं भलतंच!

झारखंड: झारखंडमधील गोड्डा येथे एक धक्कादायक घटना उघडकीस आली आहे. सोशल नेटवर्किंग साइटवर मैत्री झाल्यानंतर प्रेमसंबंध जुळले. त्यानंतर तरुणी मुंबईहून आपल्या प्रियकराला भेटण्यासाठी झारखंडमधील गोड्डा येथे पोहोचली. मात्र, त्याने तरुणीला भरबाजारात मारहाण केली. इतकेच नाही तर, तिच्या पर्समधून जवळपास दीड लाखांची रोकड आणि दागिने हिसकावून पसार झाला. मिळालेल्या माहितीनुसार, प्रियकराला भेटण्यासाठी मुंबईहून तरुणी गोड्डा येथे पोहोचली. तिचे आनंदाने स्वागत करण्याऐवजी तरुणाने तिला भरबाजारात लाथाबुक्क्यांनी मारहाण केली. तरीही ती तरुणी त्याच्यासमोर प्रेम स्वीकारावे यासाठी विनंत्या करू लागली. मात्र, त्याला तिच्यावर दया आली नाही. प्रियकराने तिच्याकडील पर्स हिसकावली. त्यातील दीड लाख रुपये रोख आणि दागिने लुटून पसार झाला. ही घटना उघड होताच, पोलिसांनी तात्काळ कारवाई करून आरोपी प्रियकराला अटक केली. पोलिसांनी त्याच्याकडून रोकड आणि दागिने हस्तगत केले. पोलिसांनी सांगितले की, प्रियकराने तरुणीला सोशल मीडियावरून प्रेमाच्या जाळ्यात ओढले होते. तरूणी ही मूळची झारखंडच्या सिमडेगा येथील राहणारी आहे. जवळपास तीन वर्षांपूर्वी सोशल मीडिया नेटवर्किंग साइटवर ओळख झाली. त्यानंतर संपर्क क्रमांक दिला. त्यावरून दोघांमध्ये बोलणे सुरू झाले. तरुणी मुंबईत नोकरी करत होती. तरुण मुंबईला गेला. तेथे प्रेमाच्या आणाभाका घेतल्या. तरुणीने त्याला कमावलेल्या पैशांतून त्याला दुचाकी घेऊन दिली. शुक्रवारी तरुणी मुंबईहून पाटणा येथे आली. पाटणा येथून तो तरूण तिला घरी घेऊन गेला. त्यानंतर तेथून तो गोड्डा येथे घेऊन गेला. तो मूळचा गोड्डा जिल्ह्यातील बेलबड्डा पोलीस ठाण्याच्या हद्दीतील धोडा गावात राहतो. तिथे गेल्यानंतर तिला घरी घेऊन न जाता तिला भरबाजारात मारहाण केली. तेथील लोकांनी मध्यस्थी करून त्याच्या तावडीतून तरुणीची सुटका केली. त्यानंतर काहींनी फोन केला. आरोपी तरूण अभिषेक कुमार तेथून फरार झाला. काही तासांनंतर पोलिसांनी आरोपीला पकडले. त्याच्याकडून पैसे जप्त करण्यात आले आहेत. पोलिसांनी तरुणीच्या तक्रारीवरून गुन्हा दाखल केला असून, तपास केला जात आहे, असे पोलिसांनी सांगितले.

from India News in Marathi: Breaking News India in Marathi | Maharashtra Times https://ift.tt/2Qzho2K