Pune : इंदापूरमध्ये ऑक्सिजनचा अवैध साठा जप्त, ५१ सिलिंडर घेतले ताब्यात

म. टा. वृत्तसेवा, : इंदापूर तालुक्यातील येथील 'एमआयडीसी'मधील 'वाय अॅक्सिस स्ट्रक्चरल स्टील प्रायव्हेट लि.' या कंपनीवर छापा टाकून इंदापूर पोलिसांनी सात लाख ५५ हजार ७०० रुपये किमतीचा ऑक्सिजनचा अवैध साठा जप्त केला. हा ऑक्सिजन या संबंधित कंपनीने सिलिंडरमध्ये साठवून ठेवला होता. ऑक्सिजनचे भरलेले ५१ सिलिंडर आणि २१ रिकाम्या टाक्या घटनास्थळावरून जप्त केल्या आहेत, अशी माहिती इंदापूर पोलिसांनी दिली. जिल्हा ग्रामीण पोलिस अधीक्षक डॉ. अभिनव देशमुख यांना मिळालेल्या गोपनीय माहितीवरून, इंदापूरचे प्रभारी पोलिस निरीक्षक धन्यकुमार गोडसे यांच्या पथकाने सोमवारी रात्री साडेआठच्या सुमारास लोणी देवकर एमआयडीसीतील कंपनीवर छापा घातला. तपासणीदरम्यान या कंपनीत ऑक्सिजनचा अवैध साठा आढळून आला. पोलिसांनी चौकशी केली असता, कंपनीत चालू आर्थिक वर्षात एप्रिलमध्ये कंपनीत एकूण १७९ ऑक्सिजन सिलिंडरची आवक झाल्याचे स्पष्ट झाले. या कारवाईत इंदापूर पोलिसांनी सात लाख ५५ हजार ७०० रुपये किमतीचा ऑक्सिजनचा अवैध साठा जप्त केला. या कारवाईची माहिती प्रभारी तहसीलदार अनिल ठोंबरे यांना माहिती देण्यात आल्याचेही पोलिसांनी सांगितले. ग्रामीण पोलिस अधीक्षकांच्या मार्गदर्शनाखाली इंदापूरचे प्रभारी पोलिस निरीक्षक धन्यकुमार गोडसे यांच्यासह दीपक पालके, महंमदअली मड्डी, अमोल गारुडी, विनोद मोरे, विक्रम जमादार यांच्या पथकाने केली. इंदापूर पोलिस पुढील तपास करीत आहेत.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3dY1WX1