खळबळ! लष्करी हद्दीतील फोटो पाकिस्तानच्या व्हॉट्सअॅप ग्रुपवर केला व्हायरल

देवळाली कॅम्प, : देवळाली येथील लष्करी हद्दीतील छायाचित्रे पाकिस्तानच्या व्हॉट्सअॅप ग्रुपवर पाठवणाऱ्या २१ वर्षीय तरुणाला पोलिसांनी अटक केली आहे. संजीव कुमार असे आरोपीचे नाव आहे. परिसरातील लष्करी हद्दीतील मिलिटरी रुग्णालयाकडे जाणाऱ्या गेटजवळ तो प्रतिबंधित क्षेत्राचे छायाचित्रे काढत होता. त्याचवेळी जवानांनी त्याला पकडले. आरोपी तरूण हा बिहारमधील आलापूर येथील आहे. तो मिलिटरी रुग्णालयाजवळील प्रतिबंधित क्षेत्र असलेल्या भागाचे फोटो आणि व्हिडिओ काढत होता. या भागात व्हिडिओ किंवा फोटो काढण्यास बंदी आहे, अशी माहिती पोलिसांनी दिली. लष्कराच्या जवानांनी आरोपीजवळील मोबाइल फोन जप्त केला आहे. त्याची चौकशी केली असता, त्याने हे फोटो पाकिस्तानमधील व्हॉट्सअॅप ग्रुपवर पाठवले होते, अशी धक्कादायक माहिती उघड झाली आहे. आरोपीला शनिवारी संध्याकाळी देवळाली कॅम्प पोलिसांच्या ताब्यात दिले आहे. लष्करी अधिकाऱ्यांच्या तक्रारीनुसार त्याच्याविरोधात गुन्हा दाखल करून अटक करण्यात आली आहे. आरोपी हा मूळचा बिहारमधील गोपालगंज जिल्ह्यातील रहिवासी आहे. देवळाली कॅम्प रेल्वे परिसरात तो एका झोपडीत राहतो. तर लष्करी हद्दीतील बांधकाम साइटवर तो मजूर म्हणून काम करतो, अशी माहिती पोलिसांनी दिली.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/34ruBxT