दिवसाढवळ्या थरार! ATM कॅश व्हॅनच्या सुरक्षारक्षकावर गोळीबार, लाखोंची रोकड लुटली

हैदराबाद: हैदराबादमधील सर्वाधिक वर्दळीच्या परिसरात दिवसाढवळ्या थरारक घटना घडली. येथील बँकेच्या एटीएममध्ये पैसे भरण्यासाठी आलेल्या एटीएम कॅश व्हॅनच्या सुरक्षा रक्षकावर दोघांनी गोळ्या झाडल्या. यात त्यांचा मृत्यू झाला आहे. गोळीबारानंतर लुटारूंनी पाच लाखांची रोकड घेऊन पोबारा केला. हैदराबादच्या कुकटपल्ली परिसरात गुरुवारी ही घटना घडली. लुटारूंनी केलेल्या गोळीबारात मृत्यू झालेले सुरक्षा रक्षक हे सीआरपीएफचे माजी जवान आहेत. ते एटीएम कॅश व्हॅनवर सुरक्षा रक्षक म्हणून कार्यरत होते. पोलिसांच्या माहितीनुसार, हल्लेखोरांनी कॅश व्हॅनचा बेगमपेठ ते कुकटपल्लीपर्यंत पाठलाग केला. जवळपास १२ किलोमीटर पाठलाग केल्यानंतर त्यांनी सुरक्षा रक्षक मिर्झा सुभान अली बेग यांच्यावर केला. यात त्यांचा मृत्यू झाला. गोळीबारानंतर त्यांनी पाच लाख लुटून पोबारा केला. पोलिसांनी दोन्ही हल्लेखोरांचा शोध सुरू केला आहे. अली बेग हे गेल्या चार वर्षांपासून या कंपनीत काम करत होते. त्यांच्या छातीजवळ गोळ्या लागल्याने त्यांचा मृत्यू झाला. एटीएम अधिकारी श्रीनिवास (वय ३३) हे गोळीबारात जखमी झाले आहेत. मिळालेल्या माहितीनुसार, दोन जण दुपारी १.५० वाजताच्या सुमारास दुचाकीवरून आले होते. त्यांच्या दुचाकीवर नंबर प्लेट नव्हती. ते कुकटपल्ली येथील पटेल कुंटा येथील एटीएम सेंटरजवळ थांबले. त्या सेंटरमध्ये अली बेग, श्रीनिवास आणि त्यांचा सहकारी नवीन हा एटीएम मशीनमध्ये रोकड भरत होते. त्याचवेळी दोघे तिथे गेले. त्यांनी त्यांच्या हातातून नोटांचे बंडल हिसकावण्याचा प्रयत्न केला. त्याला विरोध केल्यानंतर एकाने अली बेग यांच्यावर गोळीबार केला. त्यानंतर पाच लाख रुपयांचे नोटांचे बंडल घेऊन ते दोघेही पसार झाले. अली बेग यांच्या छातीजवळ गोळी लागल्याने त्यांचा मृत्यू झाला. तर श्रीनिवास यांच्या गुडघ्याच्या खाली गोळी लागली. यात ते जखमी झाले आहेत. कंपनीने केलेल्या तक्रारीच्या आधारे कुकटपल्ली पोलिसांनी गुन्हा दाखल केला आहे. सायबराबाद पोलीस आयुक्त व्हीस सज्जानार यांनी घटनास्थळी भेट दिली. पाच विशेष पथके नेमली असून, आरोपींचा शोध सुरू केला आहे.

from India News in Marathi: Breaking News India in Marathi | Maharashtra Times https://ift.tt/3vnE598