मुंबई: कोविड सेंटरमध्ये करोना रुग्णाचा नर्सवर जीवघेणा हल्ला

म. टा. खास प्रतिनिधी, : नीट उपचार मिळत नसल्याचा आरोप करत एका करोना रुग्णाने घरातून आणलेल्या चाकूने नर्सवर जीवघेणा हल्ला केल्याची घटना नुकतीच वाळकेश्वर येथील एलिझाबेथ रुग्णालयाच्या कोविड सेंटरमध्ये घडली. नर्सला वाचविण्यासाठी पुढे सरसावलेल्या डॉक्टर आणि वॉर्डबॉय यांच्यावरही हल्ला करण्याचा त्याने प्रयत्न केला. हल्ल्यानंतर पळालेल्या या रुग्णाला शोधून वरळी येथील कोविड सेंटरमध्ये ठेवल्याचे मलबार हिल पोलिसांनी सांगितले. लोअर परळच्या ना. म. जोशी मार्गावर राहणाऱ्या तरुणाला करोनाची लक्षणे दिसत असल्यामुळे १३ एप्रिल रोजी एलिझाबेथ रुग्णालयाच्या कोविड सेंटरमध्ये दाखल केले. रुग्णालयाने त्यांच्या वैद्यकीय चाचण्या घेतल्या. इतर चाचण्यांचे अहवाल आले मात्र करोनाचा अहवाल येणे बाकी होते. १५ एप्रिल रोजी रात्री इतर रुग्णांप्रमाणे येथील नर्सने या रुग्णाला चार गोळ्या दिल्या. या गोळ्या घेत असताना त्यातील दोन खाली पडल्या. यानंतर या रुग्णाने जोरजोरात माझी ऑक्सिजन पातळी खालावली आहे, मला आयसीयूमध्ये दाखल करा, अशी ओरड सुरू केली. नर्सने त्याला शांत राहायला सांगून ऑक्सिजन तपासले तर व्यवस्थित होते. मध्यरात्रीच्या सुमारास दुसऱ्या एका रुग्णाला डिस्चार्ज देण्याची प्रक्रिया सुरू असताना या तरुणाने पाठीमागून येऊन नर्सवर चाकूने वार केला. त्याला रोखण्यासाठी मागे वळताच त्याने मानेवर, डोळ्याजवळ आणि चेहऱ्यावर वार केले. त्यावेळी उपस्थित असलेले डॉक्टर आणि वॉर्डबॉय नर्सच्या मदतीला धावले. तर हा रुग्ण चाकू घेऊन त्यांच्या मागे लागला. रुग्णालय प्रशासनाने पोलिसांच्या नियंत्रण कक्षाला कळविल्यानंतर मलबार हिल पोलिस घटनास्थळी पोहोचले. त्यांनी रुग्णालयबाहेर पळालेल्या रुग्णाला शोधून काढले आणि त्याला उपचारासाठी वरळी येथील कोविड सेंटरमध्ये पाठवले. त्याच्यावर महाराष्‍ट्र वैद्यकीय सेवा-व्‍यक्‍ती आणि वैद्यकीय सेवा-संस्‍था(हिंसक कृत्‍ये व मालमत्तेची हानी किंवा नुकसान यांना प्रतिबंध)अधिनियम २०१० तसेच इतर कलमान्वये गुन्हा दाखल केला आहे. आजारातून बरा झाल्यावर त्याच्यावर कारवाई केली जाईल, असे मलबार हिल पोलिसांनी सांगितले.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/32z11FW