चाचण्याच नाहीत तर रुग्ण 'पॉझिटिव्ह' कसे आढळणार? यूपीच्या आकड्यांमागचं गणित...

जिशान रायिनी, लखनऊ : उत्तर प्रदेशात मुख्यमंत्री योगी आदित्यनाथ हे स्वत:च करोना पॉझिटिव्ह आढळले आहेत. व्हिडिओ कॉन्फरन्सिंगच्या माध्यमातून आयसोलेशनमध्ये राहूनच ते सध्या कामकाज हाताळत आहेत. याच दरम्यान खासगी लॅबनाही करोना चाचण्या करण्याचे मुख्यमंत्र्यांनी दिलेले आदेश धाब्यावर बसवण्यात आल्याचं चित्रं आहे. राज्यातील चाचणी क्षमता वाढवण्यासाठी खासगी लॅबनंही चाचण्या सुरू करण्याचे आदेश मुख्यमंत्री योगी आदित्यनाथ यांनी दिले आहेत. आमचे सहकारी 'नवभारत टाईम्स'नं ग्राऊंड परिस्थितीची पडताळणी करण्याचा प्रयत्न केलाय. या दरम्यान, अनेक खासगी लॅबमध्ये करोना चाचणी बंद करण्यात आल्याचं चित्रं लखनऊमध्ये दिसून आलं.

coronavirus in uttar pradesh : उत्तर प्रदेशात शासनाकडून आरटी-पीसीआर चाचणीसाठी ९०० रुपये निर्धारित केले असताना खासगी लॅबमध्ये चाचण्याच बंद करण्यात आल्याचं चित्रं दिसून येतंय. साहजिकच त्यामुळे सरकारी रुग्णालयांवरचा चाचण्यांचा ताण वाढलाय.

जिशान रायिनी, लखनऊ :

उत्तर प्रदेशात मुख्यमंत्री योगी आदित्यनाथ हे स्वत:च करोना पॉझिटिव्ह आढळले आहेत. व्हिडिओ कॉन्फरन्सिंगच्या माध्यमातून आयसोलेशनमध्ये राहूनच ते सध्या कामकाज हाताळत आहेत. याच दरम्यान खासगी लॅबनाही करोना चाचण्या करण्याचे मुख्यमंत्र्यांनी दिलेले आदेश धाब्यावर बसवण्यात आल्याचं चित्रं आहे. राज्यातील चाचणी क्षमता वाढवण्यासाठी खासगी लॅबनंही चाचण्या सुरू करण्याचे आदेश मुख्यमंत्री योगी आदित्यनाथ यांनी दिले आहेत. आमचे सहकारी 'नवभारत टाईम्स'नं ग्राऊंड परिस्थितीची पडताळणी करण्याचा प्रयत्न केलाय. या दरम्यान, अनेक खासगी लॅबमध्ये करोना चाचणी बंद करण्यात आल्याचं चित्रं लखनऊमध्ये दिसून आलं.

​करोना चाचणीचं दिव्य

साहजिकच त्यामुळे सरकारी रुग्णालयांवरचा चाचण्यांचा ताण वाढलाय. सरकारी रुग्णालयांसमोर चाचण्यासाठी रांगाच रांगा दिसून येत आहेत. अशावेळी करोना चाचणी करणंही अनेकांसाठी कठिण होऊन बसलंय.

कामाचा ताण वाढल्यानं आरोग्य विभागाकडून घरातून नमुने गोळा करण्याची मोहीमही बंद करण्यात आलीय. खासगी पॅथोलॉजींनीही ही सुविधा बंद केलीय. त्यामुळे अनेक वयोवृद्ध व्यक्ती, आजारी आणि गर्भवती महिलांना करोना चाचणी करण्यासाठी मोठ्या अडचणींना सामोरं जावं लागतंय.

इतकंच नाही तर वेळेतच चाचणी न झाल्यानं आणि त्यामुळे योग्य उपचार न मिळाल्यानं होणाऱ्या मृत्यूचा आकडाही वाढताना दिसत आहे

​खासगी लॅबच्या अडचणी

राज्य शासनाकडून आरटी-पीसीआर चाचणीसाठी ९०० रुपये निर्धारित केले आहेत. अनेक खासगी लॅबकडून ही फी कमी असल्याचं कारण सांगितलं जात आहे. करोना संक्रमणा दरम्यान लोक काम करण्यास नकार देत आहेत. त्यामुळे त्यांना जास्त वेतन द्यावं लागत आहे. सरकारी टीमच्या चाचणीत थोडीही गडबड झाली तर कारवाईलाही सामोरं जावं लागत आहे. त्यामुळे खासगी लॅबनं चाचण्याच बंद केल्या आहेत.

​मुख्यमंत्री कार्यालयाकडेही माहिती नाही

शहरात किती खासगी लॅबमध्ये करोना चाचण्या सुरू आहेत आणि किती नाहीत, याची यादी किंवा माहिती खुद्द मुख्यमंत्री कार्यालयालाही देता आली नाही. 'नवभारत टाईम्स'नं प्रभारी एसीएमओ डॉ. एम के सिंह यांच्याकडे ११ एप्रिल रोजी यासंबंधीतील माहिती मागितली गेली होती. परंतु, १५ एप्रिल रोजी सायंकाळपर्यंत त्याचं उत्तर मिळालं नाही. खासगी लॅबशी थेट संपर्क साधण्याचा प्रयत्नही आम्ही केला. परंतु, सर्वांकडून एकच उत्तर मिळालं... 'आमच्याकडे करोना चाचणी बंद आहे'.

​रेमडेसिविरचा काळा बाजार

करोना संक्रमण फोफावलेलं असताना राज्यात करोना उपचारांत वापरल्या जाणाऱ्या रेमडेसिविर इंजेक्शनचा काळाबाजारही सुरू असल्याचं चित्रं समोर आलंय. कानपूरमध्ये मिलिटरी इंटेलिजन्स युनिटकडून मिळालेल्या एका गुप्त सूचनेवर पोलिसांनी कारवाई केली. या दरम्यान पोलिसांनी बाबू पुरवा भागात रेमडेसिविर इंजेक्शनसोबत तीन लोकांना अटक केली. कारवाईत रेमडेसिविर इंजेक्शनच्या २६५ बाटल्या जप्त करण्यात आल्याची माहिती डीसीपी रवीना त्यागी यांनी दिली.

​प्रवासी मजुरांची स्क्रिनिंग

उत्तर प्रदेश सरकारकडून राज्यात दाखल होणाऱ्या प्रवासी मजुरांसंबंधी जिल्हाधिकाऱ्यांना दिशा-निर्देश जारी केले आहेत. राज्यात दाखल होणाऱ्या प्रवासी मुजरांच्या आगमनानंतर जिल्हा प्रशासनाकडून त्यांची स्क्रिनिंग केली जावी तसंच कोविडची लक्षणं आढळल्यास त्यांना क्वारंटाईन केलं जावं. करोना चाचणीत संक्रमित आढळल्यास त्यांना १४ दिवसांच्या कोविड रुग्णालय किंवा घरी आयसोलेट करावं. तर लक्षणविरहीत लोकांन ७ दिवसांसाठी होम क्वारंटाईन करावं, असे निर्देश देण्यात आले आहेतय

काय सांगतात आकडे?

सरकारी आकडेवारीनुसार, करोनाच्या दुसऱ्या लाटेत उत्तर प्रदेशात गेल्या २४ तासांत २२ हजार ४३९ करोनाबाधित रुग्ण आढळले आहेत तर १०४ जणांचा मृत्यू झाला. उत्तर प्रदेशात आतापर्यंत ९ हजार ४८० करोनाबाधितांचा मृत्यू झाल्याची नोंद करण्यात आलीय. यातील १४१० मृत्यू केवळ लखनऊमध्ये नोंदवण्यात आले आहेत. तर लखनऊमध्ये सध्या ३५ हजार ८६५ जणांवर उपचार सुरू आहेत.

गेल्या २४ तासांत २.१ लाख नागरिकांची करोना चाचणी करण्यात आल्याचं आकडेवारी सांगतेय. तर राज्यात आतापर्यंत ३.७३ कोटी चाचण्या झाल्याचं सांगण्यात येतंय. गेल्या आठवड्याभरात जळपास ८८ हजार नवे करोना संक्रमित रुग्णांची भर पडलीय.

सर्वाधिक संक्रमणात महाराष्ट्रानंतर उत्तर प्रदेशचा क्रमांक

गुरुवारच्या आकड्यांनुसार, संक्रमणाच्या बाबतीत महाराष्ट्रानंतर उत्तर प्रदेशचा क्रमांक लागताना दिसला. महाराष्ट्रात एका दिवशी ६१ हजार ६९५ रुग्ण आढळले तर उत्तर प्रदेशात २२ हजार ३३९ रुग्ण आढळलेत.

राज्यात आतापर्यंत एकूण ७ लाख ६६ हजार ३६० रुग्ण आढळल्याचं सरकारी आकडे सांगतात. यातील १ लाख २९ हजार ८४८ रुग्णांवर उपचार सुरू आहेत. तर ९ हजार ४८० जणांचा मृत्यू झालाय.

from India News in Marathi: Breaking News India in Marathi | Maharashtra Times https://ift.tt/3snnIYm