शेअर बाजार तेजीत ; सेन्सेक्स आणि निफ्टीची घोडदौड सुरूच

मुंबई : जागतिक बाजारातील सकारात्मक संकेतांच्या जोरावर आज शुक्रवारी गुंतवणूकदारांनी भांडवली बाजारात खरेदीचा ओघ सुरु ठेवला आहे. त्यामुळे आज सकाळच्या सत्रात सेन्सेक्स १८० अंकांनी वधारला आहे. तर निफ्टी ९० अंकाच्या तेजीसह ट्रेड करत आहे. आजच्या तेजीत महिंद्रा अँड महिंद्रा, टाटा मोटर्स, हिरो मोटो कॉर्प, बॉश्च, एमआरएफ, आयशर मोटर्स, अशोक लेलँड, मारुती, टीव्हीएस मोटर्स या शेअरमध्ये वाढ झाली आहे. त्याशिवाय एचडीएफसी, एचडीएफसी बँक, एशियन पेंट, एचसीएल टेक, इन्फोसिस, आयटीसी, अल्ट्राटेक सिमेंट हे शेअर तेजीत आहेत. विकसित देशांनी जाहीर केलेल्या आर्थिक पॅकेजमुळे जागतिक बाजाराला कलाटणी मिळेल असे संकेत दिसत आहेत. दुसरी मोठी अर्थव्यवस्था असलेल्या चीनची सुद्धा चांगली कामगिरी झाली आहे. त्यामुळे भांडवली बाजारात तेजी असल्याचे जिओजित फायनान्शिअल सर्व्हिसेसचे शेअर बाजार विश्लेषक व्ही. के. विजयकुमार यांनी सांगितले. सध्या सेन्सेक्स १०३ अंकांनी वधारला आहे. तो ४८९०६ अंकावर आहे. तर राष्ट्रीय शेअर बाजाराचा निफ्टी ७५ अंकांनी वधारला असून तो १४६५९ अंकावर आहे. गुरुवारी बाजारात बंद होताना सेन्सेक्स २५९ अंकांनी वधारला होता. तर निफ्टीत ७६ अंकांची वाढ झाली होती. गुरुवारी परकीय गुंतवणूदारांनी बाजारात ९८० कोटींचे शेअर खरेदी केले होते. जागतिक बाजारात देखील तेजी दिसून आली. गुरुवारी अमेरिकेचा डाऊ निर्देशांक ३४००० अंकांवर बंद झाला. पहिल्यांदाच डाऊ निर्देशांकाने विक्रमी टप्पा ओलांडला. नॅसडॅक कम्पोझिट इंडेक्स १८० अंकांच्या वाढीसह १४०३८ अंकावर स्थिरावला. आज शुक्रवारी आशियातील प्रमुख शेअर निर्देशांकात वाढ दिसून आली. दरम्यान, आरोग्य मंत्रालयानं जाहीर केलेल्या आकडेवारीनुसार, गुरुवारी एकूण २ लाख १७ हजार ३५३ करोनाबाधित रुग्ण आढळले आहेत. यासहीत भारतानं करोना संक्रमित रुग्णांचा आणखीन एक सर्वोच्च रेकॉर्ड कायम केलाय. याच २४ तासांत देशात १ हजार १८५ करोनाबाधित रुग्णांनी आपले प्राण गमावले आहेत. तर १ लाख १८ हजार ३०२ रुग्णांनी करोनावर मात केलीय. याचसोबत, देशातील एकूण करोनाबाधित रुग्णांची संख्या १ कोटी ४२ लाख ९१ हजार ९१७ वर पोहचलीय. तर आतापर्यंत देशात एकूण १ लाख ७४ हजार ३०८ नागरिकांनी करोनामुळे आपले प्राण गमावले आहेत. सध्या देशात १५ लाख ६९ हजार ७४३ रुग्णांवर उपचार सुरू आहेत.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/3mSDjxF