मुख्य निवडणूक आयुक्त सुशील चंद्रा, आयुक्त राजीव कुमार करोना संक्रमित

नवी दिल्ली : करोना संक्रमणातून निवडणूक आयोगही सुटू शकलेलं नाही. मिळालेल्या माहितीनुसार, मुख्य निवडणूक आयुक्त आणि निवडणूक आयुक्त कोविड १९ संक्रमित आढळले आहेत. उल्लेखनीय म्हणजे, दोन्ही अधिकाऱ्यांचं विधानसभा निवडणुकीसंबंधीचं काम मात्र व्हिडिओ कॉन्फरन्सिंगच्या माध्यमातून सुरूच आहे. सुशील चंद्रा आणि राजीव कुमार हे दोन्ही अधिकारी सध्या घरीच 'होम आयसोलेशन'मध्ये राहून उपचार घेत आहेत. तसंच घरातूनच ते व्हर्च्युअल बैठकीत सहभागीही होत आहेत. व्हिडिओ कॉलच्या माध्यमातून ते इतर निवडणूक अधिकाऱ्यांच्या संपर्कात आहेत. निवडणूक आयोगाकडे तक्रारींची रीघ पश्चिम बंगाल विधानसभा निवडणूक २०२१ दरम्यान अद्याप तीन टप्प्यांतील मतदान बाकी आहे. विधानसभा निवडणुकीत निवडणूक आयोगाकडे एव्हाना जवळपास १९ हजारांहून अधिक तक्रारी दाखल झाल्या आहेत. यातील जवळपास सर्व तक्रारींचं निवारण निवडणूक आयोगाकडून करण्यात आलंय. ८ एप्रिपर्यंत केवळ ९९ तक्रारी उरल्या होत्या. काही दिवसांपूर्वी माजी सुनील अरोरा यांनी पद सोडल्यानंतर सुशील चंद्रा यांनी आयोगाची जबाबदारी सांभाळली होती. त्यांनी १३ एप्रिल रोजी पदाची जबाबदारी आपल्या हाती घेतली. भारताचे २४ वे निवडणूक प्रमुख बनलेल्या चंद्रा यांची १४ फेब्रुवारी २०१९ रोजी निवडणूक आयुक्तपदी नियुक्ती करण्यात आली होती. अशोक लवासा यांच्यासोबत ते त्यावर्षीच्या लोकसभा निवडणूक कार्यक्रमातही सहभागी झाले होते. सुशील चंद्रा यांच्या मुख्य निवडणूक आयुक्तपदाच्या कार्यकाळात गोवा, मणिपूर, उत्तराखंड, पंजाब आणि उत्तर प्रदेशात विधानसभा निवडणुका घेतल्या जाऊ शकतात. या राज्यांच्या विधानसभेचा पाच वर्षांचा कार्यकाळ पुढच्या एका वर्षांच्या आत समाप्त होत आहे.

from India News in Marathi: Breaking News India in Marathi | Maharashtra Times https://ift.tt/3ty8e5b