भरपाई ; सेन्सेक्स-निफ्टीची आज तेजीने सुरुवात, गुंतवणूकदारांचा खरेदीकडे ओढा

मुंबई : केंद्र सरकारकडून करोना लसीकरणाला प्रोत्साहन देणे आणि उत्पादन वाढीसाठी केलेल्या अर्थ सहाय्यामुळे आज मंगळवारी भांडवली बाजाराला तरतरी आली. केंद्राच्या या प्रयत्नांमुळे करोनाचे संकट कमी होईल, या आशेने गुंतवणूकदारांनी सकाळपासून बाजारात खरेदीचा ओघ वाढवला. यामुळे सेन्सेक्स आणि निफ्टी कालच्या पडझडीतून सावरले आहेत. सेन्सेक्स जवळपास १५० अंकांनी वधारला असून निफ्टीत १०० अंकांची वाढ झाली. केंद्र सरकारने पुढील महिन्यापासून १८ वर्षांवरील सर्वांना करोना प्रतिबंधात्मक लस देण्याचा निर्णय सोमवारी संध्याकाळी घेतला. आतापर्यंत देशात १२ कोटी नागरिकांना लस देण्यात आली आहे. त्याशिवाय सिरम इन्स्टिट्यूट ऑफ इंडिया आणि भारत बायोटेक या लस उत्पादकांना ४५०० कोटींचे अर्थसहाय्य देण्याचे सरकारने जाहीर केले आहे. या उपाययोजनांमुळे भांडवली बाजारात आज वातावरण बदलले. गुंतवणूकदार पुन्हा खरेदीकडे वळाले असल्याचे शेअर बाजार विश्लेषकांनी सांगितले. सकाळच्या सत्राची सुरुवात दोन्ही निर्देशांकांनी सकारात्मक केली. आज बँका, वित्त संस्था, ऑटो, ऊर्जा या क्षेत्रात खरेदीचा ओघ दिसून आला तर आयटी क्षेत्रावर विक्रीचा दबाव आहे.सध्या सेन्सेक्स २३९ अंकांनी वधारला असून तो ४८१८९ अंकावर आहे. तर राष्ट्रीय शेअर बाजाराचा निफ्टी ८२ अंकांनी वधारला असून तो १४४४१ अंकावर व्यवहार करत आहे. मुंबई शेअर बाजाराच्या मंचावर ३० पैकी २५ शेअर तेजीत आहेत. ज्यात बजाज फायनान्स, डॉ. रेड्डीज लॅब, इंडसइंड बँक, महिंद्रा अँड महिंद्रा, एसबीआय, आयसीआयसीआय बँक, पाॅवरग्रीड, भारती एअरटेल, रिलायन्स इंडस्ट्रीज या शेअरमध्ये वाढ झाली आहे. तर दुसऱ्या बाजूला एचडीएफसी, टीसीएस, एशियन पेंट, टेक महिंद्रा, एचसीएल टेक या शेअरमध्ये घसरण झाली आहे. गुंतवणूकदारांनी सध्या आरोग्य व्यवस्थेतील तणावाकडे दुर्लक्ष केले आहे. १८ वर्षांवरील सर्वाना लसीकरण करण्याची सरकारने घोषणा केल्यानंतर त्यांच्यामध्ये आत्मविश्वास वाढला आहे. गुंतवणूकदार पुन्हा खरेदीकडे वळला असल्याचे जिओजित फायनान्शिअल सर्व्हिसेसचे शेअर बाजार विश्लेषक व्ही. के विजयकुमार यांनी सांगितले. आज चलन बाजारात डॉलरच्या तुलनेत रुपयात वाढ झाली आहे. रुपया २३ पैशानी वधारला असून तो ७४.६४ वर गेला आहे. आज बँकाच्या शेअरमध्ये तेजी दिसून आली आहे. डिसीबी, फेडरल बँक, बंधन बँक, पंजाब नॅशनल बँक, आयडीएफसी फर्स्ट बँक, एयू स्मॉल बँक या शेअरमध्ये वाढ झाली आहे. आरोग्य मंत्रालयाच्या माहितीनुसार, सोमवारी (१९ एप्रिल २०२१) रोजी एकूण २ लाख ५९ हजार १७० करोनाबाधित रुग्ण आढळले आहेत. याच २४ तासांत देशात १ हजार ७६१ करोनाबाधित रुग्णांनी आपले प्राण गमावले आहेत. तर १ लाख ५४ हजार ७६१ रुग्णांना रुग्णालयातून डिस्चार्ज देण्यात आला. देशात करोनामुळे होणारे मृत्यू हा चिंतेचा विषय ठरलाय. करोना संक्रमणानं अक्राळ-विक्राळ रुप धारण केलेलं असताना आरोग्य व्यवस्था मात्र अपुऱ्या पडत चाललेलं चित्रं देशात दिसून येतंय. देशातील महत्त्वाच्या शहरांत लावण्यात येणाऱ्या निर्बंधांमुळे आणि लॉकडाऊनमुळे हातावर पोट असणाऱ्या स्थलांतरी मजुरांसमोर पुन्हा एकदा रोजंदारीचा प्रश्न आ वासून उभा आहे.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/2RNleWy