करोनाविरुद्ध लढाईत हवाईदलही सहभागी, ऑक्सिजन-औषधं करणार एअरलिफ्ट

नवी दिल्ली : देशात हैदोस घालणाऱ्या करोना संक्रमणाच्या दुसऱ्या लाटे दरम्यान मेडिकल ऑक्सिजनसहीत इतर औषधं आणि उपकरणं तातडीनं योग्य ठिकाणी उपलब्ध करून देण्यासाठी हवाईदलही नागरिकांच्या मदतीसाठी मैदानात उतरलंय. संकटाच्या या स्थितीशी दोन हात करण्यासाठी हवाईदलाच्या माध्यमातून ऑक्सिजन सिलिंडर, आवश्यक औषधं, उपकरणं आणि आरोग्य कर्मचाऱ्यांना करण्याची जबाबदारी हवाईदलानं आपल्या खांद्यावर घेतलीय. DRDO च्या कोव्हिड रुग्णालयाला मदत भारतीय हवाईदलाच्या अधिकाऱ्यांनी दिलेल्या माहितीनुसार, IAF नं दिल्लीत डीआरडीओकडून उभारण्यात आलेल्या कोव्हिड १९ रुग्णालयात कोचीन, मुंबई, विशाखापट्टनम आणि बंगळुरू अशा अनेक भागांतून औषधं, उपकरणं आणि नर्सिंग स्टाफलाही एअरलिफ्ट करण्यात आलं आहे. तसंच भारतीय हवाईदलानं डीआरडीओचे ऑक्सिजन कंटेनरदेखील बंगळुरूहून - दिल्लीच्या कोव्हिड सेंटरपर्यंत पोहचवले आहेत. 'IAF चे ट्रान्सपोर्ट फ्लीट करोनाविरुद्धच्या लढाईत सोबत आहेत. देशभरात कोव्हिड रुग्णालयांपर्यंत मेडिकल कर्मचारी, आवश्यक उपकरणं आणि औषधं एअरलिफ्ट करण्याचं काम सुरू आहे', असं ट्विट भारतीय वायुसेनेच्या ट्विटर अकाऊंटवरून करण्यात आलंय. DRDO ची मदत आत्तापर्यंत दिल्लीत २५० बेडची क्षमता असणारं कोव्हिड सेंटर उभारण्यात आलंय. याची क्षमता वाढवून ५०० बेडपर्यंत करण्याची तयारी सुरू आहे. याशिवाय पाटण्यातही ESIC रुग्णालयात ५०० बेडसोबत कोव्हिड सेंटर उभारण्यात आलंय. लखनऊमध्ये ४५० आणि वाराणसीत ७५० बेडची क्षमता असणारं रुग्णालय उभारण्याचं काम सुरू आहे. याशिवाय अहमदाबादमध्ये डीआरडीओची ९०० बेड असणारं उभारण्यात येतंय. डीआरडीओचे संचालक जी सतीश रेड्डी यांनी संरक्षण मंत्री राजनाथ सिंह यांना याबद्दल सूचना दिली. महाराष्ट्राच्या मुख्यमंत्र्यांनी केली होती मागणी उल्लेखनीय म्हणजे, करोना संक्रमणाच्या पार्श्वभूमीवर काही दिवसांपूर्वी महाराष्ट्राचे मुख्यमंत्री उद्धव ठाकरे यांनी तातडीनं ऑक्सिजन पुरवठा करण्यासाठी हवाईदलाची मदत घेता येईल का? अशी विचारणा पंतप्रधानांकडे आपल्या जाहीर भाषणादरम्यान केली होती.

from India News in Marathi: Breaking News India in Marathi | Maharashtra Times https://ift.tt/2QSHdut