सांगली: मिरजेत सरकारी रुग्णालयातच रेमडेसिव्हिरचा काळाबाजार

उद्धव गोडसे, सांगली: जिल्ह्यात करोनाबाधित रुग्णांची संख्या वाढली आहे. अशातच रेमडेसिव्हिर इंजेक्शनची मागणी देखील वाढत आहे. याचाच गैरफायदा उचलून गरजू रुग्णांना चढ्या दराने इंजेक्शन विकणाऱ्या टोळीचा पर्दाफाश पोलिसांनी केला आहे. काळ्या बाजारात विकणाऱ्या शासकीय रुग्णालयातील वॉर्ड बॉयसह एका खासगी लॅब टेक्निशियनला स्थानिक गुन्हे अन्वेषण विभागाने सापळा रचून अटक केली. वॉर्ड बॉय सुमित सुधीर हुपरीकर (वय ३२, रा. समृध्दीनगर, विश्रामबाग) व लॅब टेक्नेशियन असलेला दाविद सतीश वाघमारे (वय २५, रा. कुपवाड रोड, विजयनगर) यांना अटक केली आहे. दोघांनी यापूर्वी ८९९ रुपये किंमत असलेले एक इंजेक्शन प्रत्येकी ३० हजार रुपयांना विकले आहे, असे दोन इंजेक्शन विकल्याची कबुली त्यांनी दिली आहे. या दोघांविरोधात विश्रामबाग पोलिसांत गुन्ह दाखल करण्यात आला आहे. करोनाचा प्रादुर्भाव वेगाने वाढत असताना रुग्णांच्या नातेवाइकांकडून रेमडिसिव्हिर इंजेक्शनची मागणी वाढत आहे. अशातच रुग्णांच्या हतबलतेचा फायदा अनेक जण उचलत असल्याचे समोर येत आहे. मोठ्या प्रमाणात रेमडेसिव्हिर इंजेक्शनची मागणी वाढत असल्याने त्याचा तुटवडा जाणवत आहे. परिणामी या इंजेक्शनचा काळाबाजार करणाऱ्यांची टोळी जिल्ह्यात सक्रिय झाली होती. या टोळीचा प्रमुख हा मिरजेतील शासकीय रुग्णालयातील कोविड विभागात काम करणारा अधिपरिचारकच असल्याचे समोर आल्याने खळबळ उडाली आहे. सुमित हुपरीकर हा मिरज शासकीय कोविड रूग्णालयात अधिपरिचारक म्हणून कोव्हिड सेक्शनमध्ये काम करीत आहे. त्या ठिकाणी दाखल असलेल्या रुग्णांना रुग्णालयाच्या उपलब्ध साठ्यातून प्रती व्यक्ती सहा डोस दिले जातात. त्यानंतर उपाचारादरम्यान पेशंटचा मृत्यू झाल्यास इतर डोस हे शिल्लक राहतात. शिल्लक राहिलेले डोस अधिपरिचारक त्यांच्या ताब्यात ठेवतात. शिल्लक राहिलेले कॅडिला हेल्थ केअर कंपनीचे रेमडेसिव्हिर घटक असलेले रेमडॅक १०० एमजी/ व्हायल इंजेक्शन, बाटलीचे लेबलवरील बॅच नंबर, मॅन्युफॅक्चर डेट, एक्स्पायरी डेट, मॅक्सीमन रिटल प्राइस, पर पॅक समोरील माहिती खोडून गरजू पेशंटना हेरून विकत होते. स्थानिक गुन्हे अन्वेषणचे पोलीस निरीक्षक सर्जेराव गायकवाड यांना याबाबत गोपनीय माहिती मिळाली. त्यांनी तातडीने याची गंभीर दखल घेत पथकाला तपासाच्या सूचना दिल्या. स्थानिक गुन्हे अन्वेषणच्या पथकाने हे दोघे एका रुग्णाला रेमडेसिव्हिर देण्यासाठी वॉलनेसवाडी येथे थांबले असल्याची माहिती मिळाली. पोलिसांनी त्या ठिकाणी छापा टाकून हुपरीकर व वाघमारे यांना ताब्यात घेतले. हुपरीकरची झडती घेतली असता, त्याच्याकडे रेमडेसिव्हिर इंजेक्शन मिळून आले. त्यांच्याकडे कसून चौकशी केली असता त्यांनी हे इंजेक्शन विकण्यासाठी आणल्याची कबुली दिली. मिरज शासकीय रुग्णालयाचा भोंगळ कारभार रेमडेसिव्हिर इंजेक्शनची मागणी वाढल्याने हे इंजेक्शन विक्रीचे अधिकार त्या त्या कोविड सेंटरमधील डॉक्टरांना दिले आहेत. मिरज शासकीय रुग्णालय आवारात असणाऱ्या एका मेडिकलमध्ये हे इंजेक्शन उपलब्ध आहे. या मेडिकलमधून दाखल रुग्णांना गरजेनुसार इंजेक्शन देण्यात येते. प्रत्येक रुग्णांना एकाच वेळी सहा इंजेक्शन देण्यात येतात. ज्या रुग्णांचा उपचारादरम्यान मृत्यू होतो त्यांचे इंजेक्शन परिचारक जमा न करता ठेवून घेऊन ते काळ्याबाजारात अव्वाच्या सव्वा दराने विक्री करतात. एखादे दिलेले इंजेक्शन वापरले की नाही, किंवा मृत रुग्णाला किती इंजेक्शन दिली याचे कोणतेही रेकॉर्ड नसल्याची धक्कादायक माहिती पोलीस तपासात उघड झाली आहे. एकूणच या प्रकारात रुग्णालय प्रशासनाचा भोंगळ कारभार उघडकीस आला असून, यात अनेक मोठे मासे पोलिसांच्या गळाला लागण्याची शक्यता आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3viXS9w