सोन्याला तेजीचा मुलामा ; आज पुन्हा सोने महागले, जाणून घ्या आजचा दर

मुंबई : देशात करोनाचा कहर सुरु असून आरोग्य यंत्रणेवर ताण वाढला आहे. यातून काही राज्यांनी दोन आठवड्यांचा कठोर लॉकडाउन लागू केला आहे. अशीच परिस्थिती राहिली तर संपूर्ण देश पुन्हा लॉकडाउनमध्ये जाईल अशी भीती व्यक्त होत असून त्याचे पडसाद भांडवली बाजारावर उमटले आहे. करोनाने धास्तावलेल्या गुंतवणूकदारांनी भांडवली बाजारातून पैसे काढून घेण्याचा सपाटा लावला आहे. तर दुसऱ्या बाजूला सोने तेजीत आहे. सलग दुसऱ्या सत्रात सोने दरात वाढ झाली आहे. आज सोमवारी कमॉडिटी बाजारात सोने आणि चांदीच्या दरात वाढ झाली आहे. सोने ४८००० रुपयांच्या नजीक कूच करत आहे. 'एमसीएक्स'वर सध्या सोन्याचा भाव ४७५६९ रुपये असून त्यात २३० रुपयांची वाढ झाली आहे. एक किलो ६८४३५ रुपये असून त्यात २४९ रुपयांची घसरण झाली. तत्पूर्वी चांदीचा भाव ६८१०४ रुपयांपर्यंत खाली आला. मल्टी कमॉडिटी एक्सचेंजमध्ये शुक्रवारी बाजार बंद होताना सोन्याचा भाव ४७३५० रुपयांवर बंद झाला. त्यात १७५ रुपयांची वाढ झाली. तत्पूर्वी सोन्याचा भाव ४७४३२ रुपयांपर्यंत वाढला होता. एक किलो चांदीचा भाव ६८६०२ रुपयांवर बंद झाला असून त्यात ६२ रुपयांची वाढ झाली. Goodreturns या वेबसाईटनुसार आज सोमवारी मुंबईत २२ कॅरेट सोन्याचा भाव ४५०२० रुपये आहे तर २४ कॅरेटचा भाव ४६०२० रुपये आहे. दिल्लीत आजचा २२ कॅरेट सोन्याचा भाव ४६२८० रुपये झाला आहे. २४ कॅरेटसाठी सोन्याचा भाव ५०४३० रुपये आहे. आज चेन्नईत २२ कॅरेटसाठी ४४६०० रुपये तर २४ कॅरेट सोन्याचा भाव ४८६५० रुपये आहे. कोलकात्यात २२ कॅरेट सोन्याचा भाव ४६३२० रुपये असून २४ कॅरेट सोन्याचा भाव ४९०२० रुपये आहे. जागतिक बाजारात स्पॉट गोल्डचा भाव ०.१ टक्क्यांनी वधारला आहे. सोन्याचा भाव प्रती औंस १७७७.३३ डॉलर झाला आहे. यूएस गोल्ड फ्युचरच्या भावात मात्र घसरण झाली आहे. यूएस गोल्ड फ्युचरचा भाव १७७७ डॉलर असून त्यात ०.२ टक्के घसरण झाली आहे. अमेरिकन फेडरल रिझर्व्हची टिप्पणी आणि यूएस ट्रेझरी यिल्डचा परिणाम सोन्यावर दिसून आल्याचे जाणकारांनी सांगितले. आरोग्य मंत्रालयानं जाहीर केलेल्या आकडेवारीनुसार, रविवारी (१८ एप्रिल २०२१) रोजी एकूण २ लाख ७३ हजार ८१० करोनाबाधित रुग्ण आढळले. याच २४ तासांत देशात १ हजार ६१९ करोनाबाधित रुग्णांनी आपले प्राण गमावले आहेत. तर १ लाख ४४ हजार १७८ रुग्णांनी करोनावर मात केलीय. याचसोबत, देशातील एकूण करोनाबाधित रुग्णांची संख्या १ कोटी ५० लाख ६१ हजार ९१९ वर पोहचलीय. तर आतापर्यंत देशात एकूण १ लाख ७८ हजार ७६९ नागरिकांनी करोनामुळे आपले प्राण गमावले आहेत. सध्या देशात १९ लाख २९ हजार ३२९ रुग्णांवर उपचार सुरू आहेत.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/2QfGfbN