परिस्थिती बिकट! ऑक्सिजनची वाहतूक करणाऱ्या टँकरची पळवापळवी

अहमदनगर: रेमडेसिव्हिर इंजेक्शन पाठोपाठ आता ऑक्सिजनचा प्रश्नही गंभीर बनला आहे. मागणीपेक्षा कमी पुरवठा होत असल्याने सगळी रुग्णालये अडचणीत आली आहेत. त्यातच आता ऑक्सिजन वाहतूक करणाऱ्या टँकरची पळवापळवी सुरू झाल्याचा प्रकार नगरमध्ये उघडकीस आला. प्रशासनाने यात लक्ष घालून पुरवठ्यावर नियंत्रण ठेवून समान वाटप केले नाही, तर खासगी कोविड रुग्णालये बंद करू, असा इशारा देण्यात आला आहे. खासगी रुग्णालयांनी आक्रमक भूमिका घेतल्याने पोलिस बंदोबस्तात सरकारी रुग्णायात नेण्यात आलेल्या टँकरमधील अर्धा ऑक्सिजन खासगी रुग्णालयांना देण्यात आला. ( For Corona Patient) नगरमध्ये सरकारी सुविधा अपुरी असल्याने सर्वाधिक रुग्ण खासगी कोविड रुग्णालयांत दाखल आहेत. जिल्हाभरातून आलेले गंभीर रुग्ण नगरच्या खासगी रुग्णालयात आहेत. त्यांना ऑक्सिजनची गरज असतेच. तो उपलब्ध होत नसल्याने डॉक्टरांची धावपळ सुरू आहे. यासाठी पुरवठादाराकडे पाठपुरावा केला जातो. प्रसंगी महागड्या दराने खरेदी करावी लागते. अशावेळी पोलिस बळाचा वापर करून ऑक्सिजनची पळवापळवी केली जात असल्यास आम्ही आमची सेवा बंद करून रुग्ण सिव्हिल हॉस्पिटलमध्ये पाठवून देऊ, असा इशाराच खासगी व्यावसायिकांनी दिला आहे. प्रशासनाला सरकारी रुग्णालयातील रुग्णांची जशी काळजी आहे, तशी खासगी रुग्णालयांतील रुग्णांची नाही काय, असा प्रश्नही उपस्थित केला आहे. वाचा: नगर जिल्ह्याला सध्या दररोज ५० टन ऑक्सिनची गरज लागते. मात्र, पुरवठा केवळ ३० ते ३५ टक्केच होत आहे. सरकारी आणि खासगी रुग्णालयांत मिळून हा ऑक्सिजन वापरला जात आहे. नगरच्या एमआयडीसीमध्ये तीन छोट्या कंपन्या असून त्यांची उत्पादन क्षमता मर्यादित आहे. ऑक्सिजन पुरवठा करणाऱ्या नगरच्या कंत्राटदारांना मराठवाड्यातील नांदेड आणि अन्य भागातील कंत्राटही मिळालेले आहे. त्यांचा भर तिकडे पुरवठा करणाऱ्यावर असतो. नांदेडला अलीकडेच साठा करण्यासाठी नवा प्रकल्प उभारला असून त्यामध्ये ऑक्सिजन भरून ठेवला जात आहे. त्यासाठी नगरहून निघालेले ऑक्सिजन येथेच थांबविण्यावर नगरच्या प्रशासनाचा भर असतो. वाचा: गुरूवारी ९ टन ऑक्सिजनचा एक टँकर पोलिस बंदोबस्तात नगरच्या सिव्हील हॉस्पिटलमध्ये आणण्यात येत होता. मात्र, त्याची मागणी नगरमधील खासगी रुग्णालयांनीही नोंदविली होती. मात्र, हा टँकर आपल्याकडे न येता जिल्हा रुग्णालयात निघाल्याचे पाहून खासगी रुग्णालयाचे डॉक्टर तेथे धावत आले. त्यांनी टँकर अडविण्याचा प्रयत्न केला. मात्र, पोलिस आणि सरकारी अधिकाऱ्यांपुढे त्यांचे चालेना. ऑक्सिजन नाही मिळाला तर आमच्या रुग्णालयातील रुग्णांचा मृत्यू होईल, असे सांगत डॉक्टरांनी तेथेच आंदोलनाची भूमिका घेतली. त्यामुळे अर्धा ऑक्सिजन जिल्हा रुग्णालयात आणि अर्धा खासगी रुग्णालयांना असा तोडगा काढण्यात आला. वाचा: मात्र, हा प्रश्न एवढ्याने सुटणारा नाही. त्यासाठी ऑक्सिजन पुरवठ्यावर नियंत्रण ठेवणारी यंत्रणा हवी, अशी खासगी डॉक्टरांची सूचना आहे. हा मुद्दा त्यांनी महाभरापूर्वीच उपस्थित केला होता, मात्र त्याकडे दुर्लक्ष करण्यात आल्याचे सांगण्यात आले. यासाठी एक पोर्टल तयार करून त्यावर ऑक्सिजनची मागणी, पुरवठा, उपचार घेत असलेले रुग्ण वगैरेंची नोंद केली तर गैरप्रकार होणार नाहीत. सध्याची वेळ लक्षात घेता कोविड रुग्णालयांना प्राधान्याने ऑक्सिजन पुरवठा करण्याचा आदेश द्यावा, यासंबंधी राज्यस्तरावरूनच नियोजन व्हावे, अशा मागण्या खासगी कोविक रुग्णालयांकडून करण्यात येत आहेत.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3tjPFRY