अवघ्या २० सेकंदांत बुलेट चोरून धूम ठोकणारा 'असा' सापडला

म. टा. प्रतिनिधी, : गर्दीच्या ठिकाणी उभ्या असलेल्या बुलेट न्याहाळून अवघ्या वीस सेकंदात बुलेटवरून 'धूम' ठोकणाऱ्याला गुन्हे शाखेने बेड्या ठोकल्या आहेत. परिसरातून चोरीस गेलेल्या बुलेटची चौकशी करताना सीसीटीव्ही तपासण्यात आला. यातून मिळालेल्या धाग्यानुसार अवघ्या आठ दिवसांत संशयिताचा माग काढण्यात पोलिस कॉन्स्टेबल मुख्तार शेख यशस्वी ठरले. पथकाने पवन उर्फ विक्की प्रेमचंद पाटील (२५ रा. उदना, सुरत) याला नंदुरबारमधून अटक केली. त्याच्याकडून १० लाख ८० हजार किंमतीच्या बुलेट आणि दोन दुचाकी हस्तगत केल्या आहेत. भद्रकाली परिसरातून ११ एप्रिल रोजी बुलेट चोरीस गेली. यावेळी सीसीटीव्ही तपासत असताना एक तरुण रेकी करीत असल्याचे गुन्हे शाखेच्या लक्षात आले. या तरुणाचा तपास करताना तो शहरातल्या हॉटेलमध्ये थांबल्याचे समजले. हॉटेलमध्ये चौकशीकरुन त्याचा मोबाइल क्रमांक ट्रेस करण्यात आला. यानंतर शेख यांना मिळालेल्या माहितीनुसार पथकाने नंदुरबार येथून पाटील यास अटक केली. पाटील हा मूळ जळगावमधील धरणगाव येथील पाळदीचा आहे. त्याने गेल्या काही दिवसांत पंचवटी, भद्रकाली आणि मुंबई नाका या पोलिस स्टेशनच्या हद्दीत प्रत्येकी एक बुलेटची चोरी केली. नाशिक सत्र न्यायालयाने त्याला एक दिवसाची पोलिस कोठडी सुनावली आहे. संशयित पाटील हा अगदी वीस सेकंदात बुलेट चोरी करायचा. पुढील चौकशीत इतरही मोटार सायकलच्या गुन्ह्यांची उकल होण्याची शक्यता आहे. - संजय बारकुंड, उपायुक्त, गुन्हे शाखा

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3ecDRKQ