हॉटेलमध्ये होणार करोनाबाधित रुग्णांवर उपचार; BMCचा मेगाप्लान

मुंबईः मुंबईत रुग्णसंख्या झपाट्याने वाढत असल्यानं रुग्णालयांतील खाटा भरु लागल्या आहेत. वाढत्या रुग्णसंख्येमुळं पालिकेनं मास्टर प्लान आखला आहे. रुग्णांवर उपचारांसाठी महापालिका फाइव्ह स्टार हॉटेल्सचा वापर करणार आहे. मुंबई महानगर पालिका आणि मुंबईतील काही खासगी रुग्णालय यांच्या संयुक्त विद्यमाने हा मेगाप्लान आखण्यात आला आहे. ४/५ स्टार हॉटेलमध्ये सौम्य संसर्ग असलेल्या रुग्णांवर उपचार होणार आहेत. ज्याची प्रकृती गंभीर नाही त्यांना खासगी रुग्णालयातून हॉटेलमध्ये हलवण्यात येणार आहे. मात्र, त्याआधी रुग्णांवर उपचार करणाऱ्या डॉक्टरांची परवानगी आवश्यक असणार आहे. मात्र, त्यासाठी शुल्क आकारण्यात येणार असल्याचंही बोललं जात आहे. रुग्णसंख्या वाढत असल्यानं मुंबईतील रुग्णालयातही खाटा भरु लागल्या आहेत. त्यामुळं गंभीर रुग्णांना वेळेवर खाटा उपलब्ध व्हाव्यात यासाठी पालिकेनं हॉटेलसोबत करार करण्याचा निर्णय घेतला आहे. तसंच, पालिकेनं काही खासगी रुग्णालये करोना रुग्णांसाठी आरक्षित करण्याचा निर्णय घेतला असल्याचीही माहिती समोर येत आहे. मुंबईत काय परिस्थिती सरकारी, खासगी रुग्णालये आणि करोना केंद्रात मिळून केवळ ४५ आयसीयू आणि १२ व्हेंटिलेटर खाटा रिक्त राहिल्या आहेत. ऑक्सिजन खाटांची स्थिती चांगली असून १ हजार ३८७ खाटा रिक्त आहेत. वाढत्या रुग्णसंख्येमुळं पालिकेनं सर्व प्रकारच्या खाटांमध्ये वाढ करण्याचा निर्णय घेतला आहे. करोना रुग्णांसाठी राखीव खाटा मुंबईतील जसलोक रुग्णालय हे कोविड उपचारांसाठी समर्पित ठेवण्यात आलं आहे. तसंच, जसलोक रुग्णालयात २५० खाटा असून बीएमसीच्या डॅशबॉर्डवर लवकरच त्याची नोंद होणार आहे. मुंबईत येत्या दीड महिन्यात आणखी तीन ठिताणी जम्बो कोविड सेंटर उभी राहणार असून त्यात दोन हजार खाटा उपलब्ध होतील, असं पालिकेनं स्पष्ट केलं आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3wZmTrW