सोने-चांदी गडगडले ; नफेखोरीने सोने आणि चांदीच्या दरात मोठी घसरण

मुंबई : करोनाच्या दुसऱ्या लाटेने देशात वैद्यकिय आणीबाणीची स्थिती निर्माण झाली आहे. औषधे, बेड, ऑक्सिजनचा तुटवडा यामुळे देशातील परिस्थिती दिवसागणिक गंभीर होत आहे. याचा मोठा परिणाम गुंतवणूकदारांच्या मानसिकतेवर झाला आहे. अनिश्चित काळात भरवशाचा पर्याय असलेल्या सोन्याबाबत देखील आता गुंतवणूकदार सावध झाले आहेत. गुंतवणूकदारांनी नफेखोरी केल्याने सोने आणि चांदीमध्ये मोठी घसरण झाल्याचे आज शुक्रवारी दिसून आले. आज कमॉडिटी बाजारात सोन्याचा भाव १३९ रुपयांनी घसरला आणि तो ४७६३३ रुपये झाला. तत्पूर्वी सोन्याचा भाव ४७५८० रुपयांपर्यंत खाली आला होता. गुरुवारी बाजार बंद होताना सोन्यात ४०२ रुपयांची घसरण झाली होती. सोन्याचा भाव प्रती १० ग्रॅम ४७८२६ रुपयांवर स्थिरावला होता. त्याआधी सोन्यात तेजी दिसून आली. सोन्याने ४८२०० रुपयांची पातळी गाठली होती. आज चांदीला देखील नफेखोरीचा फटका बसला आहे. सलग दुसऱ्या सत्रात चांदीचा भाव गडगडला आहे. 'एमसीएक्स'वर सध्या एक किलो चांदीचा भाव ६८८०२ रुपये आहे. त्यात ४१६ रुपयांची घसरण झाली आहे. तत्पूर्वी आज चांदीचा भाव ६८६५० रुपयांपर्यंत खाली आला होता. मल्टी कमॉडिटी एक्सचेंजमध्ये गुरुवारी चांदीमध्ये ११५३ रुपयांची घसरण झाली आणि चांदीचा भाव ६९१८५ रुपयांवर स्थिरावला होता. तर बुधवारी एमसीएक्सवर सोन्याचा भाव ३४३ रुपयांनी वधारला आणि ४८२०० रुपयांवर गेला. चांदीमध्ये १६१५ रुपयांची वाढ झाली होती. एक किलो चांदीचा भाव ७०३६० रुपये झाला होता. Goodreturns या वेबसाईटनुसार आज शुक्रवारी मुंबईत २२ कॅरेट सोन्याचा भाव ४५२६० रुपये आहे तर २४ कॅरेटचा भाव ४६२६० रुपये आहे. दिल्लीत आजचा २२ कॅरेट सोन्याचा भाव ४६६६० रुपये झाला आहे. २४ कॅरेटसाठी सोन्याचा भाव ५०८६० रुपये आहे. आज चेन्नईत २२ कॅरेटसाठी ४५०२० रुपये तर २४ कॅरेट सोन्याचा भाव ४९१०० रुपये आहे. कोलकात्यात २२ कॅरेट सोन्याचा भाव ४७७५० रुपये असून २४ कॅरेट सोन्याचा भाव ५००२० रुपये आहे. करोना संकटाच्या तीव्रतेने जागतिक बाजारात देखील सोने महागले आहे. आज स्पॉट गोल्डचा भाव ०.२ टक्क्यांनी वधारला असून तो १७८७.११ डॉलर प्रती औंस झाला आहे. यूएस बॉण्ड यिल्डमध्ये घसरण झाल्याने सोने महाग झाले आहे. चांदीचा भाव प्रती औंस २६.१० डॉलर झाला आहे. त्यात ०.३ टक्के घसरण झाली.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/3tMs7W2