देशात पहिल्यांदाच एका दिवसात दोन हजारांहून अधिक करोनाबाधितांचा मृत्यू

नवी दिल्ली : 'आपले साहस, धैर्य आणि शिस्तीमुळे परिस्थिती बदलण्यास वेळ लागणार नाही सर्वांचं आरोग्य आणि कुटुंबांचं आरोग्य चांगलं राहू दे, यासाठी प्रार्थना करतो' असं म्हणत पंतप्रधान नरेंद्र मोदींनी करोनाच्या नियमांचं काटेकोरपणे पालन करण्याचं आवाहन नागरिकांना केलं असलं तरी देशभरातली आरोग्य मंत्रालयाकडून जाहीर करण्यात आलेली आकडेवारी काही वेगळंच सांगतेय. देशात, मंगळवारी (२० एप्रिल २०२१) रोजी एकूण २ लाख ९५ हजार ०४१ करोनाबाधित रुग्ण आढळले आहेत. तर याच २४ तासांत देशात तब्बल २ हजार ०२३ करोनाबाधित रुग्णांनी आपले प्राण गमावले आहेत. देशात मंगळवारी एकूण १ लाख ६७ हजार ४५७ रुग्णांना रुग्णालयातून डिस्चार्ज देण्यात आला. या आकडेवारीसोबतच भारतानं करोना संक्रमणाचे गेल्या वर्षभरातील सगळे रेकॉर्ड तोडत नवीन रेकॉर्ड तयार केलेले आहेत. देशात एका दिवसात पहिल्यांदाच एवढ्या मोठ्या संख्येत मृत्यूंची नोंद करण्यात आलीय. देशातील एकूण करोनाबाधित रुग्णांची संख्या १ कोटी ५६ लाख १६ हजार १३० वर पोहचलीय. या रुग्णांवर रुग्णालयात उपचार सुरू आहेत किंवा हे रुग्ण डॉक्टरांच्या निर्देशावर आपल्या घरीच आयसोलेशनमध्ये राहून उपचार घेत आहेत. तर आतापर्यंत देशात एकूण १ लाख ८२ हजार ५५३ नागरिकांनी करोनामुळे आपले प्राण गमावले आहेत. सध्या देशात २१ लाख ५७ हजार ५३८ रुग्णांवर उपचार सुरू आहेत. एकूण करोना संक्रमित रुग्णांची संख्या : १ कोटी ५६ लाख १६ हजार १३० एकूण बरे झालेली रुग्णसंख्या : १ कोटी ३२ लाख ७६ हजार ०३९ उपचार सुरू : २१ लाख ५७ हजार ५३८ एकूण मृत्यू : १ लाख ८२ हजार ५५३ करोना लसीचे डोस दिले गेले : १३ कोटी ०१ लाख १९ हजार ३१० भारतीय वैद्यकीय संशोधन परिषदेनं (ICMR)दिलेल्या माहितीनुसार, देशात आतापर्यंत एकूण २७ कोटी १० लाख ५३ हजार ३९२ नमुन्यांची तपासणी करण्यात आलीय. यातील १६ लाख ३९ हजार ३५७ नमुन्यांची करोना चाचणी सोमवारी करण्यात आली.

from India News in Marathi: Breaking News India in Marathi | Maharashtra Times https://ift.tt/3x9PCul