Oxygen Crisis: शेवटच्या क्षणी ऑक्सिजन दाखल, 'त्या' ६० रुग्णांचे प्राण वाचले

नवी दिल्ली : देशाची राजधानी असलेल्या दिल्लीत सध्या ऑक्सिजनचा मोठ्या प्रमाणात तुटवडा दिसून येतोय. याच दरम्यान सर गंगाराम रुग्णालयात ऑक्सिजन केवळ दोन तासांपुरताच ऑक्सिजन उरला असून गेल्या २४ तासांत २५ रुग्णांनी आपले प्राण गमावल्याचा तातडीचा संदेश रुग्णालयाकडून प्रशासनाला धाडण्यात आला होता. त्यानंतर प्रशासनानं जलद हालचाली करत रुग्णालयाला ऑक्सिजनचा पुरवठा केलाय. वेळेतच ऑक्सिजन मिळाल्यानं धोकादायक परिस्थितीत असलेल्या ६० रुग्णांच्या कुटुंबीयांचा जीव यामुळे भांड्यात पडलाय. दिल्लीच्या अनेक रुग्णालयांकडून सरकारकडे लवकरात लवकर करण्याची मागणी केली जातेय. याच दरम्यान, सर गंगाराम रुग्णालयात गेल्या २४ तासांत ऑक्सिजनअभावी २५ रुग्णांनी प्राण सोडलाय. तर गंभीर अवस्थेत असलेल्या ६० रुग्णांचा जीव धोक्यात आहे. रुग्णालयात अवघ्या दोन तास पुरेल एवढाच ऑक्सिजन साठा उपलब्ध आहे. पुढच्या दोन तासांत उरलेला ऑक्सिजनही संपुष्टात येईल. व्हेन्टिलेटर आणि बायलेव्हल पॉझिटिव्ह एअरवे प्रेशर योग्य पद्धतीनं काम करत नाही. रुग्णालयात आयसीयू आणि ईडीमध्ये मॅन्युअल पद्धतीनं व्हेन्टिलेशन सुरू आहे' असा संदेश सर गंगाराम रुग्णालयाकडून देण्यात आला होता. त्यानंतर सकाळी १०.०० वाजल्याच्या सुमारास गंगाराम रुग्णालयाला ऑक्सिजनचा साठा उपलब्ध झाला. 'मॅक्स रुग्णालायतही ऑक्सिजनचा तुटवडा' सोबतच, दिल्लीच्या मॅक्स रुग्णालयानंही शुक्रवारी सकाळी ट्विट करून ऑक्सिजनचा तुटवडा असल्याचं सांगितलं होतं. मॅक्स स्मार्ट रुग्णालय, मॅक्स साकेत रुग्णालयात केवळ काही तासांपुरताच ऑक्सिजन उरल्याचं सांगण्यात आलं होतं. त्यानंतर सकाळी १०.०० वाजल्याच्या दरम्यान मॅक्स रुग्णालयाला तीन तास पुरेल एवढा तातडीचा ऑक्सिजन पुरवठा करम्यात आलाय. त्यानंतर आणखीन एक वाहन ऑक्सिजन घेऊन लवकरच रुग्णालयात दाखल होईल, असं दक्षिण दिल्लीच्या पोलीस उपायुक्तांनी म्हटलंय. मॅक्सच्या दोन रुग्णालयांत जवळपास ७०० रुग्ण आहेत यात ५५० कोव्हिड रुग्णांचा समावेश आहे. दरम्यान दिल्लीत गेल्या २४ तासांत २६ हजार १६९ रुग्ण आढळलेत तर ३०६ रुग्णांचा मृत्यू झालाय. सध्या दिल्लीत ९१ हजार ६१८ रुग्णांवर उपचार सुरू आहेत. आतापर्यंत दिल्लीत १३ हजार १९३ रुग्णांच्या मृत्यूची नोंद करण्यात आलीय.

from India News in Marathi: Breaking News India in Marathi | Maharashtra Times https://ift.tt/3neuEG5