क्षणात एक लाख कोटींचा चुराडा! शेअर बाजारात सेन्सेक्स-निफ्टी गडगडले

मुंबई : जागतिक पातळीवरील नकारात्मक संकेत आणि आजपासून सुरू होणाऱ्या संसदेच्या अधिवेशनावर लक्ष देऊन असलेल्या गुंतवणूकदारांनी बाजार उघडताच जोरदार विक्री केली. यामुळे सेन्सेक्समध्ये जवळपास ६०० अंकांची मोठी घसरण झाली असून निफ्टीत १८७ अंकांची घट झाली. या धक्क्याने गुंतवणूकदारांना जवळपास एक लाख कोटींचा फटका बसला आहे. आजच्या सत्रात बँका, आयटी शेअर, मेटल, ऑटो या क्षेत्रात गुंतवणूकदारांनी चौफेर विक्री केली आहे. सुरवातीला सेन्सेक्स ६३३ अंकांच्या घसरणीसह ५२५०६ अंकावर खुला झाला. तर निफ्टीने १८७ अंकांच्या घसरणीसह १५७३५ अंकावर आजच्या दिवसाची सुरुवात केली. निफ्टी मंचावर एनटीपीसी, एचसीएल टेक, टायटन, बीपीसीएल , नेस्ले या निवडक शेअरमध्ये वाढ झाली आहे. तर दुसऱ्या बाजूला एचडीएफसी बँक हा शेअर ३ टक्क्यांनी घसरला. नुकताच बँकेचा तिमाही निकाल जाहीर झाला होता. मात्र आज त्यात गुंतवणूकदारांनी नफावसुली केल्याचे दिसून आले. तसेच बँकिंग क्षेत्रात इंडसइंड बँक, ऍक्सिस बँक, एचडीएफसी या शेअरमध्ये घसरण झाली आहे. दरम्यान, काही देशांमध्ये करोनाच्या डेल्टा व्हेरिएंटने दहशत माजवली आहे. ही साथ पसरली तर धोका वाढेल या भीतीने संस्थात्मक गुंतवणूकदारांनी बाजारातून पैसे काढण्यास सुरुवात केली आहे. त्यामुळे आज मोठी पडझड झाली असल्याचे शेअर दलालांनी सांगितले. करोनाच्या दुसऱ्या लाटेला हाताळण्यात सरकारला आलेले अपयश, इंधनांच्या वाढलेल्या किमती या मुद्द्यांवरून सरकारला घेरण्याची तयारी विरोधकांनी केली आहे. दुसरीकडे १७ नवी विधेयके मांडण्याची मोदी सरकारची तयारी असून, त्यापैकी तीन विधेयके सध्याच्या विधेयकांऐवजी मांडली जातील.

from व्यवसाय बातम्या: Business News, Stock Market, GST, Real Estate | Maharashtra Times https://ift.tt/3rkvUd1